Thursday, May 10, 2007

تاء التأنيث


بتعرفي شو ... احلى شعور بالعالم لما تغسلي وجهك بالليل ..
بتحسّي انه بتشيلي قرف اليوم و هموم العالم
بس بنفس الوقت بتكوني عم تحضري وجه جديد يقابل بكرا
ليحمل وجهك غبرة المدينة و الشوارع بكل ما فيها من اخبار معلقة بالهوا و عالورق
كلها بتفوت على مسام جلدك .. و انت بتفكري انك مش حاسة فيها، و انك قادرة تنكريها، و انه هي مش مأثرة فيك.. و انه آخر همك ..لأنه العالم موجود من برّا.. و ما في قوة بالعالم بتسمح للوضع انه يجرّح ما في داخلك .. و يعطّل نفسيتك
بس
بترجعي بآخر النهار.. بمحلول هنّ صنعوه مش احنا .. بتمسحي وجهك
لتشوفي غبرة الكون كله على بياض القطن ..
و تحسّي بالنظافة ..من دون ما تحسّّي انه الغبرة الاثقل موجودة جوا عقلك و قلبك ..
و انه ما في قطنة بالعالم بتقدر تفوت هناك
و لو فاتت..
شو بدها تمسح لتمسح...

3 comments:

Anonymous said...

لا شكر على واجب ... بعدين الفكرة موجودة ما بدها مين يلهمك لطلعيها صح يا صديقتي

Amal Ziad Kaawash أمل زياد كعوش said...

الفكرة مرات بتكون نايمة و مش حاسين فيها

بنحتاج حدا يوقظها .. حتى لو كان بمجرد حديث عابر

بس لما الهم يكون واحد .. الافكار بتضل مصابة بالأرق

كوني بخير صديقتي :)

Anonymous said...

u r the best girl :P